Душанбе, 7-уми майи соли 2026
7-уми майи соли 2026 дар дафтари асосии Маркази миллии тестии назди Президенти Ҷумҳурии Тоҷикистон бо мақсади мониторинги рафти баргузории арзёбии Таҳқиқоти байналмилалии пешрафти саводи хондан (Progress in International Reading Literacy Study – PIRLS) дар соли 2026 ва баррасии нақшаҳои оянда дар доираи ин таҳқиқот вохӯрии роҳбарияти Марказ бо намояндагони Бонки ҷаҳонӣ баргузор гардид.
Дар вохӯрӣ директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ, муовини якуми директори Марказ Шодиниё Абдулбосит Шодӣ, намояндагони Бонки ҷаҳонӣ ва дигар масъулини соҳа иштирок намуданд.
Бояд гуфт, ки бо дастгирӣ ва таваҷҷуҳи доимии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои рушди соҳаи маориф ва илм дар Ҷумҳурии Тоҷикистон ва мутобиқ намудани низоми таҳсилот ба меъёрҳои байналмилалӣ тадбирҳои муҳимму саривақтӣ амалӣ гардида истодаанд. Яке аз чунин иқдомҳои муҳим иштироки Тоҷикистон дар арзёбиҳои байналмилалӣ, аз ҷумла арзёбии байналмилалии PIRLS 2026 мебошад.
Дар оғози вохӯрӣ дар бораи корҳои анҷомдода, давоми панҷ моҳи охир маълумот пешниҳод гардид. Гуфта шуд, ки мувофиқи нақша ин таҳқиқот давоми моҳҳои апрел ва майи соли равон дар 171 муассисаи таълимии таҳсилоти миёнаи умумӣ, ибтидоӣ ва миёнаи асосии 52 шаҳру ноҳияи ҷумҳурӣ бо иштироки 6945 хонандаи сифҳои 4-уми муассисаҳои таълимии кишвар гузаронида шуд. Коркард ва таҳлили додаҳо дар давоми моҳҳои май ва июни соли 2026 ба нақша гирифта шудааст.
Зикр гардид, ки натиҷаҳои арзёбии PIRLS 2026 барои муайян намудани вазъи воқеии сатҳи саводнокии хонандагон, такмили барномаҳои таълимӣ ва таҳияи сиёсати минбаъдаи соҳа заминаи муҳим фароҳам меоранд. Ҳамзамон, ин раванд имконият медиҳад, ки Ҷумҳурии Тоҷикистон мавқеи худро дар муқоиса бо кишварҳои дигар муайян намуда, таҷрибаи пешқадамро дар низоми миллии маориф ҷорӣ намояд.
Фаъолияти Маркази миллии арзёбии PIRLS аз ҷониби намояндагони Бонки ҷаҳонӣ хуб арзёбӣ гардида, барои беҳтар намудани сифати кор дар ин самт ба масъулини соҳа тавсияҳои судманд дода шуд.
