Душанбе, 29-уми марти соли 2026
29-уми марти соли 2026 кормандони Маркази миллии тестии назди Президенти Ҷумҳурии Тоҷикистон Наврӯзи байналмилалӣ – ин ҷашни аҷдодиро дар саҳни бинои асосии Марказ таҷлил карданд.
Саҳну бинои Марказ идона ороста шуда, суфраи идона бо хӯрокҳои миллӣ, ҳафтсину ҳафтшин ва бозиҳои Наврӯзӣ – ҳамчун эҳёи суннатҳои Наврӯзӣ – ба намоиш гузошта шуд.
Бояд гуфт, ки ташкили бозиҳои Наврӯзӣ, оростани дастархони идона бо ҳафтсину ҳафтшин ва омода кардани хӯрокҳои миллӣ кӯшише барои арҷгузорӣ ба суннатҳои наврӯзии ниёгон ва ҳифзи арзишҳои фарҳангӣ аст.
Дар оғоз директори Марказ Ҷаъфарзода Сабзалӣ Файзалӣ кормандонро бо фарорасии ҷашни Наврӯз ва эҳёи табиат шодбош гуфта, қайд кард, ки бо заҳмату талошҳо ва сиёсати фарҳангпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчун ҷашни байналмилалӣ пазируфта шудани Наврӯз аз ҷониби Созмони Милали Муттаҳид баёнгари он аст, ки миллати тоҷик аз замони бостон то имрӯз бо хулуси ният ва ормони олӣ падидоварандаи ҷашне буд, ки паёми ваҳдату муҳаббат, покию садоқат, зебоию нафосат, хираду заковат, ростию адолат ва кӯшоиву меҳнат аст.
Наврӯз танҳо як ҷашн нест – он рамзи эҳёи табиат, оғози зиндагии нав, поксозии руҳу ҷисм ва навсозии андешаҳо, оғози умед ва эҳёи арзишҳои инсонист. Ин ид аз умқи ҳазорсолаҳо сарчашма гирифта, то имрӯз ҳамчун мероси гаронбаҳои фарҳангии мо боқӣ мондааст. Наврӯз замоне фаро мерасад, ки табиат аз хоби гарон бедор мешавад. Замин либоси сабз ба бар мекунад, осмон соф мегардад ва инсон низ мехоҳад дигар шавад, беҳтар шавад.
Миллате, ки Наврӯз дорад, миллатест, ки реша дорад, тамаддун дорад ва оянда дорад. Аз ин рӯ, ҳифз ва гиромидошти Наврӯз – ин танҳо эҳтиром ба гузашта нест, балки масъулият дар назди оянда низ ҳаст.
Ин ҷашн моро водор месозад, ки кори худро бо нерӯи тоза идома диҳем, муносибатҳои кориро боз ҳам устувортар гардонем ва ба дастовардҳои нав ноил гардем, –қайд кард Ҷаъфарзода С. Ф..
Дар идома барои болидаруҳии кормандони Марказ барномаи рангини фарҳангӣ бо иштироки аҳли ҳунари кишвар пешниҳоди иштирокдорон гардонида шуд.
Дар анҷом роҳбарияти Маркази миллии тестии назди Президенти Ҷумҳурии Тоҷикистон бо кормандон дар боғи фарҳангию фароғатии ба номи Садриддин Айнӣ ба сайри дастаҷамъона баромаданд.
