Душанбе, 24-уми майи соли 2019
Рӯзи 23-юми майи соли 2019 дар Муассисаи давлатии “Китобхонаи миллии Тоҷикистон” дар мавзӯи “Арзёбии сифати таҳсилот: ҳадаф, мушкилот, дурнамо” мизи мудаввар баргузор гардид. Дар мизи мудаввар, ки ташкилкунандаи он Маҷлиси намояндагони Маҷлиси Олии Ҷумҳурии Тоҷикистон ва Вазорати маориф ва илми Ҷумҳурии Тоҷикистон буданд, намояндагони Маҷлиси намояндагон, Вазорати маориф ва илм, ректорон ва ноибони ректорони муассисаҳои таълимии таҳсилоти олии касбӣ иштирок намуданд. Лозим ба зикр аст, ки дар ин ҷаласа ноиби ректори Донишгоҳи давлатии иқтисодии Санкт-Петербург Горбашко Елена Анатолевна низ ширкат карда, дар мавзӯи зикршуда маърӯза кард.
Мавзӯи матраҳгардида аз тарафи маърӯзакунандагон ва иштирокдорони ин чорабинӣ ҳамчун яке аз масъалаҳои муҳимми соҳаи маорифи ҳар як кишвар дар замони муосир арзёбӣ гардид. Таъкид карда шуд, ки сифати таҳсилот – нишондиҳандаи асосии низоми маориф сатҳи натиҷаҳои воқеии таҳсилот ва таъминоти раванди онро инъикос менамояд.
Баромадкунандагон асосан ба ҷанбаҳои гуногуни масъалаи сифати таҳсилот дар муассисаҳои таълимии таҳсилоти олии касбӣ диққати махсус доданд.
Дар ин чорабинӣ муовини якуми директори Маркази миллии тестии назди Президенти Ҷумҳурии Тоҷикистон Ҷаъфаров С. Ф. дар мавзӯи “Имтиҳонҳои марказонидаи дохилшавӣ ва сифати интихоби довталабони муассисаҳои таълимии таҳсилоти олии касбӣ” баромад карда, дар бораи омилҳои асосии таъминкунандаи интихоби босифати довталабони арзанда барои муассисаҳои таълимии мазкур маълумот дод. Номбурда дар баромади худ, ки бар рейтинги ҳамгиро (интегралӣ) дар асоси додаҳои имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ дар соли 2018 тамаркуз ёфта буд, вобастагии сифати интихоби довталабонро барои муассисаҳои таълимии таҳсилоти олии касбӣ аз якчанд нишондиҳанда шарҳу тавзеҳ дод. Тибқи маълумоти пешниҳодгардида дар асоси натиҷагирӣ аз рейтинги ҳамгиро нишон дода шуд, ки дар соли 2018 довталабони аз ҷиҳати донишу омодагӣ пешгом бештар ба кадоме аз муассисаҳои таълимии таҳсилоти олии касбӣ тақсимот шудаанд.
