Душанбе, 21-уми октябри соли 2023
Довталабони гиромӣ – онҳое, ки худро дар давраи сеюми иловагии бақайдгирӣ аз рӯйи ихтисосҳои Донишгоҳи миллии Тоҷикистон сабти ном кардаанд!
Қаблан хабар дода будем, ки давраи сеюми иловагии бақайдгирӣ аз рӯйи ихтисосҳои донишгоҳи мазкур 19-уми октябри соли 2023 ба анҷом расонида шуд. Ҳамчунин, огоҳ карда будем, ки тибқи нақша имтиҳонҳо барои довталабоне, ки дар давраи сеюми бақайдгирӣ ихтисосҳоро аз Донишгоҳи миллии Тоҷикистон интихоб кардаанд, рӯзи 22-юми октябри соли 2023 баргузор карда хоҳад шуд ва маълумоти иловагии марбут ба ин масъала баъдан дар сомонаи Марказ нашр мешавад.
Муқаррар шуд, ки имтиҳон (қисми А) барои чунин довталабон 22‑юми октябри соли 2023 дар 2 муассисаи воқеъ дар шаҳри Душанбе – муассисаи таҳсилоти миёнаи умумии № 25-и ба номи Убайд Раҷаби ноҳияи Сино (кӯчаи Исмоили Сомонӣ, 59, рӯбарӯйи беморхонаи “Қаряи боло” ва Ширкати саҳомии холдингии кушодаи “Барқи Тоҷик”) ва муассисаи таҳсилоти миёнаи умумии №100-и ноҳияи Шоҳмансур (кӯчаи Назаршоев, 17, назди маркази савдои “Ёқут-2000” ва чойхонаи “Вохӯрӣ” (саристгоҳи роҳи оҳан)), ки дар заминаи онҳо маркази имтиҳонӣ ташкил гардидааст, баргузор карда мешавад.
Ба рақами телефони мобилии ҳар довталаб дар бораи замону макони имтиҳонсупориаш паёмак (SMS) фиристода шуд. Агар довталаб бо сабабе ин паёмакро дарёфт накарда бошад, барои гирифтани маълумот бояд тавассути телефонҳои 224 53 67 ва ё 224 53 68 бо Марказ дар тамос шавад.
Довталабон бояд на дертар аз соати 11:00 дар маркази имтиҳонии дахлдор ҳозир шаванд.
Ба довталабон риояи шарту талаботи барои имтиҳонҳо муқарраршуда, аз ҷумла инҳо, ҳатмист:
1. Бо худ овардани ҳуҷҷату ашёи зерин:
- шиноснома ё ҳуҷҷати дигари тасдиқкунандаи шахсият (бо муҳр ва сурат), ки мақоми ваколатдори давлатӣ додааст;
- 2 дона ручкаи одии рангаш сиёҳ (рангҳои дигар иҷозат дода намешавад, зеро варақаи ҷавобҳои бо рангҳои дигар қайдшуда аз ҷиҳати технологӣ дуруст коркард намешавад);
Довталаб метавонад дар зарфи шаффоф барои худ оби нӯшокӣ орад.
2. Овардани ашёи зерин қатъиян манъ аст:
- ҷузвдон, китоб, ҳар гуна навиштаҳо, дафтар, маводи иттилоотӣ;
- телефони мобилӣ ва дигар таҷҳизоту воситаҳои алоқа ва ҳисоббарор (калкулятор, ноутбук, планшет ва ғайра).
