Душанбе, 17-уми апрели соли 2025
17-уми апрели соли 2025 дар маҷлисгоҳи Литсейи касбии техникии нақлиёти автомобилии шаҳри Душанбе ҷаласаи васеи кормандони Маркази миллии тестии назди Президенти Ҷумҳурии Тоҷикистон бо намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон, вобаста ба баррасии пешниҳоди Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар бораи пешгирӣ ва бартараф намудани сабабу шароитҳое, ки ба содир намудани ҷиноят ва дигар ҳуқуқвайронкуниҳои хусусияти коррупсионидошта мусоидат менамояд, доир гардид.
Дар ҷаласа, ки намояндаи Агентии мазкур низ ҳузур дошт, кормандони бахшҳои минтақавии Марказ дар шаҳру ноҳияҳои Хоруғ, Хуҷанд, Панҷакент, Бохтар, Кӯлоб, Данғара ва Рашт ба таври маҷозӣ ва омӯзгорони Литсейи касбии техникии нақлиёти автомобилии шаҳри Душанбе низ иштирок доштанд.
Дар вохӯрӣ муовини якуми директори Марказ Шодиниё Абдулбосит Шодӣ ва сарнозири Раёсати муқовимат бо коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон Файзуллозода Баҳрулло оид ба хавфу хатарҳои коррупсия ва пешгирию бартараф намудани амалҳои коррупсионӣ суханронӣ намуданд.
Муовини якуми директори Марказ Шодиниё А. Ш., дар суханронии худ таъкид намуд, ки коррупсия мушкилоти мубраму шадиди замони муосир гашта, хатар ба амнияти миллату давлат дорад. Муқовимат бо коррупсия дар кишварҳои дунё, аз ҷумла Ҷумҳурии Тоҷикистон ба таври густурда роҳандозӣ карда шудааст. Аз ҷумлаи роҳҳои муқовимат ба коррупсия гузаронидани корҳои профилактикию фаҳмондадиҳи миёни кормандон ва сахттару шадидтар кардани ҷавобгарӣ мебошад.
Сипас сарнозири Раёсати муқовимат ба коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон Файзуллозода Баҳрулло суханронӣ намуда, зикр кард, ки моддаи 22-юми Қонуни Ҷумҳурии Тоҷикистон “Дар бораи муқовимат бо коррупсия” як қатор монеаҳоро муайян намудааст, ки дар мавриди мавҷуд будани ин монеаҳо, шахс наметавонад ба мансабҳои давлатӣ ё мансабҳои ба онҳо баробаркардашуда таъйин ё интихоб шавад. Дар идома Файзуллозода Б. таъкид намуд, ки барои таъмини иҷрои сиёсати давлатии зиддикоррупсионии кишвар пеш аз ҳама, таҳти назорати қатъӣ қарор додани рафти таъмини иҷрои меъёрҳои қонунгузорӣ дар ин самт, инчунин, ташкил ва амалӣ намудани мониторинги барномаҳои давлатӣ нақши муҳим дорад. Зеро, танҳо дар сурати пурзӯр намудани назорати иҷрои Қонуни Ҷумҳурии Тоҷикистон “Дар бораи муқовимат бо коррупсия” ва барномаҳои давлатии зиддикоррупсионӣ, метавон ба ҳадафҳои стратегии давлат дар самти муқовимат ба коррупсия расид.
