Душанбе, 5-уми ноябри соли 2025
5-уми ноябри соли 2025 дар толори Маркази миллии тестии назди Президенти Ҷумҳурии Тоҷикистон ба ифтихори ҷашни муқаддасу таърихӣ – Рӯзи Конститутсияи Тоҷикистони соҳибтиқлол ҷаласаи тантанавӣ баргузор шуд.
Дар он директори Марказ Ҷаъфарзода Сабзалӣ Файзалӣ, мудири шуъбаи таблиғот ва иттилооти Кумитаи иҷроияи ҲХДТ дар ноҳияи Исмоили Сомонӣ Гадоев Абдурасул, мудири бахши омори Кумита Ҳусейнов Сомон ва кормандони Марказ иштирок намуданд.
Ҷаласа бо садо додани Суруди миллӣ ва суханони табрикотии директори Марказ Ҷаъфарзода Сабзалӣ Файзалӣ оғоз шуд. Ҷаъфарзода С. Ф. қайд кард, ки Конститутсия барои мо, тоҷикистониён, на танҳо маҷмуаи қоидаҳои ҳуқуқӣ, қонуни асосии давлат, балки ҳуҷҷати тақдирсозест, ки самтҳои асосии рушди иҷтимоӣ, иқтисодӣ ва фарҳангии кишварро муайян намуда, кафолати пойдории сулҳу субот, ваҳдати миллӣ ва таъмини ҳуқуқу озодиҳои инсон ва шаҳрванд, ифодагари иродаи қавии миллат дар бунёди ҷомеаи демократӣ, ҳуқуқбунёд ва дунявӣ мебошад. Он ҳуқуқи шаҳрвандонро, аз ҷумла ҳуқуқ ба таҳсил, кор, тандурустӣ ва иштирок дар ҳаёти сиёсиро муҳофизат мекунад, озодии сухан, баробарӣ ва амнияти миллиро таъмин месозад. Конститутсия – ин ҳуҷҷати сарнавиштсоз шиносномаи миллат ва муҳимтарин дастоварди даврони соҳибистиқлолии мо ба ҳисоб меравад. Конститутсия баёнгари ормонҳои деринаи халқи тоҷик барои бунёди ҷомеаи демократӣ, ҳуқуқбунёд ва дунявӣ мебошад.
Дар давраи соҳибистиқлолии Ҷумҳурии Тоҷикистон таҳти роҳбарии хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо такя ба Конститутсияи кишвар, дар тамоми соҳаҳои ҳаёти ҷомеа дигаргуниҳои куллӣ ба амал омада, Тоҷикистони азиз дар арсаи байналмилалӣ мақоми шоистаи худро пайдо намуд. Конститутсия ба мо ҳуқуқ ва озодиҳо медиҳад ва дар айни замон, масъулияти бузурги шаҳрвандӣ низ мегузорад. Ҳар яки мо бояд Конститутсияро эҳтиром намуда, дар ҳифзи арзишҳои он саҳмгузор бошем.
Маркази миллии тестӣ низ, ки зери назорати Президенти кишвар фаъолият мекунад, ҳамчун як ниҳоди муҳимми соҳаи маориф дар татбиқи меъёрҳои конститутсионӣ, бахусус дар самти таъмини ҳуқуқи шаҳрвандон ба таҳсил ва дастрасии одилона ба муассисаҳои таълимии таҳсилоти миёнаю олии касбӣ, нақши арзанда дорад. Марказ Конститутсия ва қонунҳои дигари амалкунандаи кишварро дар фаъолияташ роҳнамои худ сохта, дар таъмини адолати иҷтимоӣ вобаста ба таҳсилот саҳмгузор мебошад. Мо ба воситаи имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон ва самтҳои дигари фаъолиятамон барои арзёбии дониши наврасону ҷавонон ва рушди сатҳи маърифати ҷомеа мусоидат мекунем. Бо такя ба меъёрҳои Конститутсия мо кӯшиш мекунем, ки принсипҳои шаффофият ва адолатро дар ҳамаи ҷанбаҳои корамон таъмин намоем, – қайд кард директори Марказ Ҷаъфарзода С. Ф.
Сипас мудири шуъбаи таблиғот ва иттилооти Кумитаи иҷроияи ҲХДТ дар ноҳияи Исмоили Сомонӣ Гадоев Абдурасул суханронӣ карда, ба ҳозирин дар иҷрои босамари супоришҳои роҳбарияти олии кишвар барору муваффақият ва саломативу рӯзгори обод таманно намуд.
Дар идомаи ҷаласа мутахассиси фанни таърихи раёсати таҳияи маводди имтиҳонии Марказ Аминзода Шамсулло ва мутахассиси фанни ҳуқуқи раёсати мазкур Салоҳидинова Симо дар бораи аҳаммияти таърихиву ҳуқуқии ин санади тақдирсоз суханронӣ намуда, аз ҷумла қайд карданд, ки Конститутсия, асосҳои сиёсиву ҳуқуқӣ ва иқтисодиву фарҳангии ҷомеа ва давлати Тоҷикистонро муайян ва низоми мукаммали ҳуқуқу озодиҳои инсонро муқаррар карда, механизми амалигардонии онҳоро кафолат дод. Дар асоси меъёрҳои конститутсионӣ кафолати таъмини амалишавии ҳуқуқу озодиҳои инсон ва ҳифзи онҳо асоси сиёсати давлат эътироф гардидааст ва Тоҷикистон дар муносибатҳои хориҷии худ сиёсати дарҳои кушода ва омодагии худро дар самти ба роҳ мондани ҳамкориҳои судманд бо давлатҳо ва созмонҳои байналхалқӣ дар асоси принсипи баробарӣ ва эҳтироми соҳибихтиёрӣ эълон кард.
Дар анҷоми ҷаласа 2 нафар аз ҷумлаи ҳайати асосии кормандони Марказ ба узвияти Ҳизби Халқии Демократии Тоҷикистон пазируфта шуданд.
