Душанбе, 9-уми апрели соли 2026
9-уми апрели соли 2026 дар муассисаи давлатии таълимии “Мактаби байналмилалии Президентӣ” (шаҳри Душанбе) даври чорум (ҷумҳуриявӣ)-и олимпиадаҳои фаннии равияи ҷамъиятӣ-гуманитарӣ барои хонандагони синфҳои 11-уми муассисаҳои таълимии таҳсилоти миёнаи умумии кишвар баргузор шуд.
Дар маросими ифтитоҳи олимпиадаҳои муовини вазири маориф ва илми Ҷумҳурии Тоҷикистон Каримзода Равшан Азам, муовини якуми директори Маркази миллии тестии назди Президенти Ҷумҳурии Тоҷикистон Шодиниё Абдулбосит Шодӣ, муовини директори Маркази ҷумҳуриявии дарёфт ва рушди истеъдодҳо Нурулло Ғафориён, хонандагони муассисаҳои таълимии таҳсилоти миёнаи умумии кишвар, волидон, омӯзгорони муассисаҳои таълимӣ, намояндагони раёсату шуъбаҳои маорифи шаҳру ноҳияҳои ҷумҳурӣ ва дигарон иштирок намуданд.
Дар оғоз муовини вазири маориф ва илми Ҷумҳурии Тоҷикистон Каримзода Равшан Азам иштирокдорони даври чоруми олимпиадаҳои фанниро барои то ба ин давр расиданашон таҳният гуфта, зикр кард, ки кӯдакони болаёқат ҳамчун «захираи тилоӣ» бо иштирок дар олимпиадаҳои фаннӣ дар рушду нумуи илм ва маорифи кишвар саҳми назаррас мегузоранд.
Дар идома муовини якуми директори Маркази миллии тестии назди Президенти Ҷумҳурии Тоҷикистон Шодиниё Абдулбосит Шодӣ дар бораи тартиб ва шартҳои баргузории олимпиадаҳо суханронӣ намуда, қайд кард, ки олимпиадаҳои фаннӣ на танҳо як мусобиқа, балки як мактаби воқеии кашфи истеъдодҳо, рушди тафаккури мантиқӣ ва тарбияи насли ояндасоз мебошанд. Маҳз дар ин майдонҳо олимони ояндаи мо, мутахассисони варзидаи соҳаҳои гуногун камол меёбанд. Дар ҷаҳони муосир, ки рақобати зеҳнӣ ва технологӣ рӯз аз рӯз шидат мегирад, нақши чунин чорабиниҳо боз ҳам муҳимтар мегардад.
Маркази миллии тестӣ, ҳамчун ниҳоди масъул дар самти арзёбии дониш ва низоми имтиҳонгирӣ, дар ташкил ва такмили олимпиадаҳои фаннӣ низ таваҷҷуҳи махсус ва пайваста медиҳад, зеро маҳз тавассути чунин озмунҳо метавон лаёқатмандону соҳибзавқонро муайян кард ва барои рушди минбаъдаи онҳо заминаи мусоид фароҳам овард.
Ҳукумати мамлакат таҳти роҳбарӣ ва сиёсати хирадмандонаю маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба созмон додану баргузории чунин озмунҳо барои муайян рушду такомули зеҳнии аҳли ҷомеа, бахусус наврасону ҷавонони кишвар таваҷҷуҳи зиёде зоҳир менамояд, зеро парвариши насли донову заковатманд яке аз авлавиятҳои стратегии мамлакат аст, – қайд кард Шодиниё А. Ш.
Имсол тибқи нақша дар олимпиадаҳои номбурда 1343 нафар хонанда аз фанҳои равияҳои ҷамъиятӣ-гуманитарӣ ва табиӣ-риёзӣ иштирок мекунанд. Олимпиадаҳои фаннии равияи табиӣ-риёзӣ ва технологияи иттилоотӣ, инчунин аз фанни таърих 10-уми апрели соли ҷорӣ баргузор хоҳад шуд. Натиҷаҳои даври ҷумҳуриявии олимпиадаҳои фаннӣ 12-уми апрели соли равон эълон мешавад.
Тазаккур бояд дод, ки олимпиадаҳои мазкурро ҳар сол Маркази миллии тестии назди Президенти Ҷумҳурии Тоҷикистон якҷоя бо муассисаи давлатии “Маркази ҷумҳуриявии дарёфт ва рушди истеъдодҳо” ба роҳ мемонад.
