Душанбе, 25-уми феврали соли 2015

Дар мувофиқа бо Хадамоти зиддиинҳисории назди Ҳукумати Ҷумҳурии Тоҷикистон  арзиши хизматрасонӣ дар имтиҳонҳои марказонидаи дохилшавӣ 170 (яксаду ҳафтод) сомонӣ муқаррар карда шудааст.

Тибқи тартиби муқарраргардида ятимони кулл ва бепарасторон, ки хоҳиши иштирок дар имтиҳонҳои мазкурро доранд, аз пардохти маблағ пурра озоданд. Довталабоне, ки ё падар ё модарашон вафот кардаанд, барои иштирок дар имтиҳонҳои марказонидаи дохилшавӣ танҳо 50 дарсади маблағи муайяншударо – 85 сомонӣ пардохт мекунанд.

Довталабони имтиёздор бояд ҳангоми бақайдгирӣ ҳуҷҷатҳои дахлдори зеринро пешниҳод кунанд:

-     хатти вафоти падару модар (асл ва нусха) ва шаҳодатнома дар бораи таваллуди довталаб (асл ва нусха) барои ятимони кулл;

-     хатти вафоти падар ё модар (асл ва нусха) ва шаҳодатнома дар бораи таваллуди довталаб (асл ва нусха) барои ятимон;

-     ҳуҷҷати тасдиқкунанда дар бораи бепарастор будани довталаб, ки мақомоти ваколатдори давлатӣ додааст (асл ва нусха).

Ёдрас мекунем, ки ба монанди соли қаблӣ довталабон бояд пеш аз бақайдгирӣ дар яке аз филиалҳои Бонки давлатии амонатгузории Ҷумҳурии Тоҷикистон “Амонатбонк” маблағи муайяншударо супоранд ва расид дар бораи пардохтро ҳангоми бақайдгирӣ пешниҳод намоянд.

Рӯйхати филиалҳои Бонки давлатии амонатгузории Ҷумҳурии Тоҷикистон “Амонатбонк” бо нишониҳои онҳо дар сомонаи марказ ҷой дода мешавад.